新政府總部及立法會大樓取名「門常開」，睇怕要改名咯，叫「門常關」至啱！點解？一來新大樓實施鐵腕管治，對記者採訪諸多限制，甚至粗暴阻撓採訪，咁仲唔係門常關？二來咯喎，一個踐踏新聞自由嘅政府，係咪遲早關門大吉先？
即係咁，上屋搬下屋，唔見一籮穀，諗唔到立法會搬咗新居，竟然連保護新聞自由嘅核心價值都丟咗落堆填區。呢，立法會前日首次喺新大樓舉行答問大會，例牌成為傳媒採訪焦點，點知當曾蔭權到場，一眾記者蜂擁而上採訪拍攝，居然發生匪夷所思嘅事情，荒謬程度可以媲美「一哥」曾偉雄嘅「黑影論」。
發生乜嘢事呢？只見廿幾名立法會保安齊齊化身黑影，以身遮擋記者鏡頭，有攝影記者仲畀保安員推撞同按壓相機，有數名保安索性包圍記者，阻止記者移動。立法會外新聞自由被打壓，早前北大人訪港所出現嘅一幕又上演一次，令人眼界大開。
嗱，新立法會大樓外唔准採訪，大樓之內一樣禁區處處，採訪諸多掣肘。北大人訪港所到之處，警方設立「核心保安區」，已經令人嘆為觀止，估唔到立法會仲勁，直頭將新大樓內嘅大片範圍列為「禁止採訪區」，除咗議員同官員等人形物體，閒人與記者一律不得內進。唉，立法會搬屋，新大樓闊落咗，但係記者嘅採訪空間卻被嚴重收縮，功夫茶想問一句立法會主席曾鈺成，呢啲算唔算金玉其外，敗絮其中？立法會助紂為虐，阻撓記者採訪，干擾新聞自由，佢哋又有何資格監察政府呢？
話時話，干擾新聞自由呢家嘢就好似傳染病咁，一經爆發就好易變成風土病。立法會保安員淪為打壓新聞自由嘅工具，議事堂外成為採訪禁地，可能係受到港府傳染啩，事關立法會搬近咗新政府總部，近朱者赤，近墨者黑，咪有樣學樣咯。
其實，港府干擾新聞自由早有前科，其他唔講，警方浪費公帑更換數碼通訊系統，主要目的就係為咗斷絕傳媒消息來源。仲有吖，「一哥」曾偉雄形容記者係黑影，更加反映出高官嘅心態，佢哋施政無能，愧對市民，私德有虧，心裏有鬼，梗係見到黑影就驚啦。
一句講晒，傳媒係第四權，記者係社會守門人，如果連立法會都門常關，香港核心價值不保，自由之都嘅招牌睇怕都唔擺得幾耐咯！