政情：雷曼聆訊洪丕正認衰

渣打銀行（香港）行政總裁洪丕正尋日上立法會出席雷曼聆訊。面對議員連環質詢，洪丕正不慍不火，好似被問到○八年雷曼兄弟倒閉前嘅信貸評級下跌，點解渣打「唔單聲」畀客仔知；洪丕正話呢個訊息係公開資料，大家可以睇到，當時渣打都借咗錢畀雷曼，若早知會出事，都提早追數啦，只係當時唔覺雷曼會冚啫！佢仲認衰話，望番轉頭，當初冇察覺雷曼有倒閉危機而採取相應措施，可能都係錯誤判斷。正所謂錯就要認、打就企定，洪丕正呢招可能聰明得多！