理文主場攞威唔赦東方龍獅
「中銀人壽香港超級聯賽」今晚上演獨腳戲，由今季自立門戶的理文首度於將軍澳運動場的主場出擊，迎戰開季錄得兩連敗的東方龍獅。上仗有部分主力因傷缺陣，作客0比1不敵陽光元朗的理文，陣中如佐迪、顏樂楓及黎耀昌等球員均有望傷愈復出，與絕無失分餘地的東方龍獅對壘，激戰可期，記得睇東網直播睇好波喇！（東網on.cc周五晚8時直播）
理文上輪賽事作客元朗大球場一仗，分別有隊長佐迪、羅俊仁、顏樂楓及「扭扭昌」黎耀昌等因傷倦勤，賽事進行期間更先後有黃駿軒及余沛康勇戰受傷退下火線，最終球隊在不乏攻勢下僅以0比1不敵對手。
馮嘉奇：藉死球攻勢偷雞
理文領隊馮嘉奇認為，球隊上仗製造了不少入球機會，只是埋門一腳未能好好處理，同時強調球隊需要時間磨合︰「其實對元朗之前都預測賽果會一球上落，己隊亦有唔少埋門，只係把握唔到機會。聯賽係長時間嘅戰線嚟，所以我唔想冒險起用受傷球員博一場勝利返嚟。球隊始終仲處於磨合期，只要隊友加強溝通，表現會有所改善。」對於理文今季首次主場出擊，「馮奇」亦期望球隊可以在東方龍獅身上搶到分︰「希望球隊先做好防守，之後再嘗試藉死球攻勢『偷雞』入波。」
司徒Sir：最緊要打番起信心
開季便遇上兩連敗的東方龍獅，今仗有李志豪停賽，傷兵方面只有早前進行足部手術的李康廉，以及正在恢復的洛迪古斯。主教練司徒文俊認為，球隊需要在控制比賽節奏及避免犯錯方面多加留意︰「其實開季兩場都踢得唔錯，只係一啲犯錯或者偶然嘅碰撞畀到機會對手，導致失波。上場對和富大埔上半場打得好，有攻勢、有埋門，仲入到波，但係節奏控制唔需要經常都快，否則會導致失波。球隊有時係心急咗啲，所以平時訓練都會同球員喺概念上有所調節。」
「司徒Sir」亦指，球員需要克服自信心的問題︰「開季不順始終會為球隊帶嚟影響，但唔係能力問題，而係信心問題，相信隨住球隊愈踢愈順，並且入多啲波，信心就會返嚟。」