政情：世博鴨仔團議員嗌慘

今次世博團暫時有四十二位議員參加，原先話咗會去嘅自由黨方剛，一見到呢次行程成日要行路同埋企，自問自己隻痛腳未必應付到，前日正式提出退團，至於會唔會再有人臨時退出就有待靜觀其變。

根據行程表，佢哋後日早上六點四十五分就由立法會啟程，先去港澳碼頭搭船到番禺南沙港，然後坐旅遊巴去廣州火車南站轉高鐵往武漢，到咗武漢又再坐旅遊巴去武漢天河機場搭飛機去上海。工聯會議員KK黃國健笑笑口話，一日裏面搭齊海陸空交通工具，真係犀利！

兩日參觀十展館

第二日，世博行程正式開始，佢哋朝早七點就出發，會先後參觀中國館、香港館、兩個主題館、日本館、沙特阿拉伯館同埋非洲聯合館。KK用兩個字形容就係「慘呀！」仲話就算朝早有精神睇，睇到晏晝個人都吽晒啦！加上佢透露第一晚到埗後，議員黃宜弘打算宴請班議員暢飲，萬一有人飲到唔知醒就好笑嘞！

到咗第三日，相信大家都殘殘哋喇，但仍要八點鐘又開始參觀，包括城市最佳實踐區、企業館區、歐盟館、英國館同埋美國館，到晏晝四點九就出發去上海浦東機場搭飛機返港，預計夜晚十一點先返到。

眼見行程密成咁，冇回鄉證嘅民主黨李永達諗住開小差，同黨友李華明一齊唔出席星期日晚一個官式晚宴，爭取幾粒鐘喺上海「自由行」，不過成唔成事仲係未知數。

素來硬朗嘅葉劉淑儀都慨嘆話，呢次行程幾辛苦㗎！所以建議女士們着平底鞋，行路都行得舒服啲，而且佢聽聞嚟緊幾日上海天氣轉涼兼有雨，所以會帶多幾件衫去慎防冷親。至於專業會議議員梁美芬就顯得有啲無奈，事關佢兩個仔出世之後，每年母親節佢都會同埋佢媽媽及兩個仔一齊慶祝，今年佢要去上海，到依家都唔敢開口同兩個仔講。睇嚟呢個世博團令人煩惱多過歡樂，方剛唔去好可能係明智之舉。