政情：甄文達撐台山幫籌款煮幾味

盧振雄開金口「撲水」

鬼聲鬼氣嘅甄文達原來係台山人，佢話台山地勢近海，海產豐富，盛產鹹魚同鹹蝦，為咗將家鄉美食發揚光大，佢即場以呢兩樣材料炮製鹹魚炒蝦球及鹹蝦炒帶子做慈善拍賣，籌得五千銀。

盧振雄亦義不容辭幫手「撲水」，上台同女拍檔唱咗首《兩忘煙水裏》，盧Sir開金口，話咁易就籌到十幾萬；警務處副處長李家超都上台唱咗支歌仔，同樣籌到十幾萬。

自由黨主席劉健儀（Miriam）原來都係台山人，佢自爆台山話了得，因為嫲嫲自細訓練有素，但自從老人家過身後，無咗練習對象，日久生疏晒。Miriam慨嘆工作忙，至今未有機會返鄉下，但同鄉睇得起佢，委任佢做基金會嘅榮譽會長。