政情：鐵頭仁幫阿涂做替工
立法會議員涂謹申每年都喺預算案辯論時提出修訂動議，取消警方線人費。由回歸以嚟，阿涂足足提咗十一次相同嘅動議，雖然每次都被否決，但佢都永不放棄，年年重提、次次肉緊。點知阿涂嘅決心敵唔過病毒，佢尋日發高燒缺席立法會會議，改由民主黨主席何俊仁為佢操刀。
話說阿涂尋日患咗重感冒，發燒燒到差唔多攝氏三十九度，逼住要留喺屋企休息。民主黨黨團拿拿臨商議由邊個頂替，正路嚟講就應該由身兼民主黨保安事務副發言人嘅何俊仁頂上，不過佢可能一時唔記得咗自己係副發言人，大家搞咗一輪先決定由佢接手。
不過阿涂搞咗線人費問題咁耐，真係唔係其他人一下子就接到手，所以鐵頭仁就算拎咗阿涂份講稿照讀，一開始都非常生硬。不過身為律師嘅何俊仁，好快就熟能生巧，之後仲阿涂上身，叉住腰望住署理保安局局長黎棟國嚟鬧，雖然最後所有動議都無法通過，但都叫做對得住黨友！