公牛爭季後賽有危機
【本報綜合報道】今季東岸「老8」爭奪戰認真精彩！公牛尋日主場贏塞爾特人後，本來出線季後賽形勢大好，但同時間竟然被人踢爆教練迪尼高之前曾經同副會長幾乎開拖，家陣仲要請律師處理，今朝隨時輸埋畀山貓臨尾香。
今朝贏山貓即掂
公牛尋日贏波可以話全靠一對「後場孖寶」，當中戴歷羅斯取得職業新高嘅39分，至於軒域治就有30分，帶領公牛主場以101比93擊敗塞爾特人，今朝只要作客擊敗山貓，就唔使理速龍對紐約人嘅戰果，肯定以東岸老8出線季後賽。
可惜喺呢個咁關鍵時刻，美國傳媒收到匿名人報料，大爆公牛教練迪尼高同副會長柏臣，喺上個月尾對太陽時就諾亞上陣時間發生衝突。據講柏臣喺賽後怒氣沖沖衝入迪尼高嘅辦公室，一手捉住迪尼高嘅領帶，仲推咗佢心口兩下，之後迪尼高反挑佢「隻揪」。迪尼高尋日承認的確曾經同柏臣有衝突，但就否認有講手。消息指公牛高層好不滿呢件事，已搵律師希望同目擊證人傾吓，公牛一班球員唔擔心就假！