小販當賊辦食署混帳

居於筲箕灣的黃女士不時前往望隆街購物，日前下午時分，黃於上址其中一檔蔬果檔選購生果時，突有數十名食環署職員如臨大敵般「殺到」。黃受墟冚場面所嚇，即時閃避一旁，只見職員將蔬果檔重重包圍，二話不說便將檔戶貨物悉數充公，在旁圍觀巿民也為之側目，「佢哋（檔戶）又唔係做賊，使唔使咁多人去拉一檔，人哋都係靠勞力搵食啫！」黃女士因不滿食環署以多欺少，即時拍下食環署職員粗暴執法照片，準備用作公開該署「惡行」鐵證。

欺善怕惡辱長者

當日同樣在場的王先生亦坦言不值該署所為，認為有欺善怕惡之嫌，「周街咁多檔都一樣阻街，又唔見佢哋去拉？淨係識蝦啲阿公、阿婆！」

食環署出動大批職員執法，充公貨物。

陳太對當日被食環署職員檢走貨物及檢控，顯得一臉無奈。

記者事後重返現場，向當日遭檢控的檔戶陳太了解情況，陳太談及事件時猶有餘悸，「我都知個檔擺出外面係唔啱，但都唔使咁多人嚟捉㗎，充公晒啲貨仲要罰七百蚊，真係好難做！」陳太於上址售賣雜貨、蔬果已逾十年，收入僅夠一家餬口，經過當日食環署「洗劫」後因擔心「搵埋都唔夠罰」，已將水果檔口結業。

促檢討執法準則

「搞到好似拉賊咁大陣仗，又真係幾誇張！」立法會食物安全及環境衞生事務委員會副主席黃容根批評食環署執法矯枉過正，容易打擊本港自由營商環境，同時擔心過激的檢控行動或會令小商戶反彈，造成不良後果，促盡快檢討有關執法制度，釐定準則。

東區區議員勞鍱珍則指，筲箕灣街市十室九空，不少檔戶紛紛於望隆街、大德街及愛秩序街謀生，因競爭激烈而時有違規情況。勞促該署重新規劃街市，讓資源充分運用，免造成浪費。

就職員執法被指勞師動眾一事，食環署發言人避而不答，僅稱當日職員乃跟進街道阻塞投訴，由於上址有多間店舖及固定小販攤檔，遂因應行動實際需要安排人手，以便有效打擊違規行為。去年十二月至今，該署曾就上址小販及商舖阻街共提出逾一百五十宗檢控。