保殊重創速龍老八勢危
為求力保東岸前八位置，速龍尋日作客騎士付出沉重代價，「龍王」保殊開賽僅兩分鐘就被占美臣手肘批爆面，結果血流披面要即時送院，初步診斷後保殊右邊頜骨及鼻骨都有骨折迹象，大有可能缺席餘下常規賽賽事。
速龍現時正與公牛爭奪東岸第八位，希望趕上季後賽尾班車，但呢支多倫多部隊今場認真倒楣，當家球星保殊喺開賽後兩分鐘，就於一次搶截中被占美臣手肘批中面部倒地，「龍王」及後狀甚痛楚，加上血流披面，結果需要即時送院檢查。亦因為保殊嘅提早離場，速龍在首節已落後9分，因其餘主力如陶告魯及加特朗等發揮亦欠佳，結果騎士由頭帶到尾，輕鬆以113比101贏波。騎士「大帝」勒邦占士今場則射入19分及交出13次助攻。
縱入季後賽亦難復出
保殊經過醫院掃描後，右邊頜骨及鼻骨都有骨折迹象，現時佢會繼續留在克利夫蘭醫院作進一步檢查，若「龍王」確認骨折嘅話，佢將會缺席餘下五場常規賽賽事，對於現時被公牛步步進逼的速龍，無疑屬一大打擊。就算速龍能夠打入季後賽，相信保殊亦難以傷愈復出。
幸好競爭對手公牛同日亦以74比79不敵公鹿，後者雖有中鋒波格特因傷缺陣，但沙蒙斯倒戈攻入全場最高26分，協助球隊贏波並鎖定季後賽席位，公鹿近四年來首次打季後賽。
本報綜合報道