中環出更：同款卡地亞冧掂三猛男
香港鐘錶業總會早前舉行六十三周年晚宴暨新一屆會董就職典禮，由太子珠寶執行董事朱繼陶（Joseph）接任主席。當晚貴賓冠蓋雲集，個個穿戴不凡，話晒大家都係做呢行，扮靚梗有心得。最令人驚喜係三位猛男不約而同情迷Cartier嘅Santos男裝錶，證明英雄所見略同！
呢三位猛男就係太子珠寶主席鄧鉅明（Jimmy），卡地亞中國代理、百利建國際董事總經理陳正欣（Daniel），同埋資深創作人、亮劍映畫總裁甘國亮。三位猛男都話好難得，佢哋不僅是唔介意「撞錶」，仲話要影張相留念添！究竟隻錶有咩特別，令三個大男人為之折服？
Daniel話隻錶係○四年出嘅一百周年特別版，目的係紀念一九○四年出嘅Santos型號，當時係全球第一隻可以畀飛行員戴住飛上天嘅腕錶。隻錶喺○四年推出後好受男士歡迎，依家都仲係好賣得嘅錶款。當晚三隻錶因材料唔同，價錢都有出入，好似Daniel嗰隻係鋼造，約四萬元，而Jimmy嗰隻係全金打造，價值約十六萬元。
朱鄧麗萍 閃爆全場
男人晒冷，女人都唔執輸。女主人朱太朱鄧麗萍當晚悉心打扮，粉頸戴住條價值二十八萬元、三十八卡嘅閃爆鑽石頸鏈，玉手戴住二十一卡、價值十九萬元嘅手鏈，靚爆全場。朱太廿幾年前同細佬Jimmy創辦太子珠寶，喺老公Joseph嘅全力支持下，太子珠寶生意氣勢如虹，依家Joseph仲做埋行業嘅龍頭，真係可喜可賀。
大家樂主席陳裕光伉儷當晚都結伴前來，佢係市務推廣學會榮譽主席，去年鐘錶業嘅出入口總值已高達八百幾億元，係香港好出色嘅經濟支柱，佢梗要嚟道賀以示支持！
卓妮