政情：光哥難忘「越南難民」
相信「北漏洞拉，木精塞該……」呢段電台廣播，大家都好熟。保安局局長李少光唔單止記得，潛意識仲好深添。立法會議員尋日質詢當局，點解越南人來港要簽證，而光哥回應時，開口嗑着脷，將「越南國民」講錯為「越南難民」，畀「橄欖」陳鑑林笑佢，話越南嘅經濟已經唔同晒，唔該大家對越南人嘅目光都改改啦。
橄欖尋日喺立法會提咗條質詢，擺明質當局歧視越南人，入境要簽證，同其他地區旅客嘅免簽證待遇唔同。光哥回應時落筆打三更，一開口就將「越南國民」讀錯成「越南難民」，佢可能畀自己嚇親，其後再讀「越南國民」，格外小心。
光哥解釋，過去五年，香港平均每年約有五百六十名犯事者係越南國民，非法入境者有五百四十人，而東盟十國對越南入境亦有簽證要求。光哥答完，橄欖乘勝追擊，話：「局長你頭先都漏咗嘴啦」，暗示光哥對越南人嘅印象仲停留喺「北漏洞拉」嘅年代，好唔應該。