政情：白姐姐補選以慢打快

落區收集街坊提名

白姐姐尋日同佢嘅好拍檔立法會議員謝偉俊，以一身白色打扮，到長沙灣一間酒樓收集提名。有份簽名嘅陳先生就話，覺得白姐姐「幾得意」所以支持佢，但就強調佢純粹想多啲人出嚟參選，要佢喺補選度投白姐姐一票就咪搞嘞，亦有食客簽完名後問身邊友人：「佢（白姐姐）係咪出嚟選區議員？」

白姐姐話好有信心一日內可以收集到三百個簽名。佢又話有好多台灣嘅歌星朋友，因為唔鍾意台灣嘅政治文化先移民嚟香港，點知依家毓民又喺議會掟嘢，搞到班小朋友以為掟擦紙膠「好威威」，所以先決定要出嚟撥亂反正。佢仲話自己講嘢咁慢，可以「以慢打快」喎。不過白姐姐講咁多嘢，最後係咪真係遞表參選呢，就要睇多幾日先知嘞。