政情：徒孫開拍《葉問前傳》
電影《葉問》大熱令一眾演員大紅大紫，原來亦都激起本港市民習武嘅興致。早前我哋見到有份投資套戲嘅武術總會副會長冼國林，佢話本港好多武術道館生意突然好咗，學員少則增加五成，多則暴增三倍。所以佢索性乘勝追擊，再投資約五千萬元拍攝《葉問前傳》，一半為投資一半為興趣，希望藉此推廣詠春。
冼國林係葉問個仔葉準嘅徒弟，習武二十幾年。《葉問前傳》係講述葉問如何由一個後生仔變成一代宗師，所以冇大明星排場，主角係冼國林徒弟杜宇航，佢係最年輕嘅世界武術冠軍。八十幾歲嘅葉準亦都會喺戲中出現，四代徒孫一脈相傳，都幾有賣點。冼國林話要拍出正宗佛山嘅味道，因佢師傅、老婆、杜宇航同埋戲中五十個師傅都係佛山人！
冼國林一手湊大永亨財務公司，兩、三年前佢自創第一信用財務公司，賺到盆滿缽滿，佢笑謂就嚟同拍檔反面，因為佢太瞓身於武術，成日「不務正業」。不過佢梗唔會收手，仲唔排除下一次拍唔同嘅拳種添！