政情：憤青掟廿蚊難為謝志峰

飲食界立法會議員張宇人早前喺《城市論壇》提出「廿蚊論」後，即被在場憤青怒擲廿蚊紙抗議，原來呢廿蚊令節目主持謝志峰好苦惱。謝志峰尋日喺節目開始前雖然冇交代張廿蚊嘅下落，不過就鄭重呼籲在場人士唔好再留低任何財物，仲話唔理對方因乜動機亂派錢，佢最終只會報警處理喎。一班比「維園阿伯」更激嘅「維園阿哥」自從進駐《城市論壇》後，經常「突襲」節目嘉賓，睇怕謝志峰訂幾多規矩都禁唔晒佢哋層出不窮嘅招數喇。