政情：陳唐芷青歌劇禁毒
金管局總裁陳德霖太太陳唐芷青冧莊，再做強制性公積金計劃管理局行政總監三年，到二○一三年屆滿。陳太○三年署任咗一年，今年踏入「七年之癢」，不過佢同積金局都繼續「恩愛」，但就有傳媒認錯佢呢個「正印」，將佢同積金局對外事務部主管陳利碧衡掉轉咗。尋日兩位陳太一齊行街街，「陳利氏」即刻笑笑口話︰「唔好搞錯呀，佢至係『正印』陳太呀！」
兩位陳太都相當玩得，嚟緊「陳唐氏」仲會粉墨登場，身為女童軍副會長嘅陳唐芷青，下月廿五日會喺女童軍嘅禁毒大匯演上同其他名媛女童軍一齊做舞台劇，宣傳禁毒訊息。除咗做戲，陳太仲會開金口唱歌添。不過因為今次係做一個禁毒劇，所以陳太無乜角色扮演，只要做番自己勉勵吓啲後生就得，聽落好似好簡單咁，不過陳太同其他有份演出嘅靚太們都好認真，依家距離演出仲有差唔多成個月，佢哋已密鑼緊鼓綵排，攞咗飛嘅朋友到時記得早啲到紅館睇表演啦！