有「黑英」外號嘅前天文台台長林超英舊年退休，正喺度適應其退休生活，以前做天文台台長鬼咁忙，依家佢無官一身輕，又嫌自己唔夠忙，佢話正處於「退休過度活躍期」，「身痕」要四圍做嘢，仲有就係四處遊歷吸收新嘅事物，不斷令自己增值。
林超英早幾日擔任一個長者畢業禮嘅主禮嘉賓，唔知係咪要拉近同長者嘅距離，佢講到自己嘅退休生活，話自己從心理學角度嚟講，正處於「退休過度活躍期」，除咗睇唔同類型嘅書外，又不停去送「外賣」，意思係到處做主禮嘉賓同出席演講咁解，佢好享受同周圍嘅人傾偈，從中亦獲益良多。
林超英唔止識天文學，講到終身學習就扯到人類學同生物學上，話人同動物嘅分別，在於動物一出世就有覓食求生本能，但人就唔同，人天生無牙無爪，要透過不斷學習新知識才能成長。哦，原來係咁！
