中環出更：霍家大小姐樂做平凡人
香港武術總會新一屆執委早前舉行就職，由霍英東集團揸弗人霍震寰連任會長。武總喺香港大會堂美心皇宮舉行慶祝活動，現場到賀嘅名人同武林高手雲集，令卓妮大開眼界，最特別係霍家三姐弟難得同時出現喺公開場合，平時好低調嘅大家姐霍麗萍（Pat）都嚟支持細佬，而霍震霆就以香港體育協會暨奧委會會長身份擔任主禮嘉賓，盡顯霍家第二代對本港武術嘅支持。
細佬揸弗 坐享其成
阿Pat係霍家長女，佢話好享受做平凡人，笑謂有細佬們接手父親嘅事業同埋公益活動，所以佢可以坐享其成。其實佢哋幾兄弟姐妹感情好好，個個星期日都會約埋食飯，霍震寰仲對家姐推崇備至，讚佢多才多藝。
阿Pat佢好有藝術細胞同文藝氣質，佢喺香港讀完小學後，中學就去咗歐洲讀書，大學喺美國南加州大學洛杉磯分校修讀環保設計。佢好有語言天分，法語同德語都頂呱呱，又熱愛旅遊、攝影，成日周圍去影相，歐美、中東、非洲同祖國都有佢嘅足迹。累積多年遊歷，最近阿Pat諗住再出本新嘅攝影集，書名暫定為《美麗安靜世界》，卓妮好期待先睹為快。
卓妮喺晚宴上仲見到前市建局行政總監林中麟，佢係武總副會長。林中麟同卓妮話，自己同霍老一樣都係皇仁仔，當然霍老係佢大大師兄，佢話六十年代霍老成立咗支叫「有榮」七人足球隊，經常喺維園踢波，佢都係忠實擁躉，自此與霍家結緣。
卓妮