中環出更：蔡加讚行善夥友晒林寶
意大利跑車林寶堅尼唔係人人啱揸，喺香港只有二百部，而香港林寶堅尼會就有六十幾個會員，前晚喺海港城展出二十部唔同型號嘅車款。身為會員之一嘅蔡加讚同埋其他林寶會兄弟早早就揸咗自己架車去海港城三號露天停車場stand-by，望住廿架林寶齊齊喺維港前面打開對翼，卓妮都忍唔住讚句好型呀！
加讚嘅白色Murcielago LP670-4 SuperVeloce排首位，其他仲有唔同嘅型號，嘉賓只要捐一百蚊就可以同呢廿部由三百三十萬到六百三十萬不等嘅林寶合照，佢哋係為低收入家庭中有言語障礙嘅小朋友提供治療嘅慈善機構「庭恩兒童中心」籌款。
載爸爸兜風談車經
加讚受爸爸玩具大王蔡志明影響，從小就係林寶迷，現時家有七部林寶，但係佢做嘢忙到暈，所以平時出入都係坐司機揸嘅七人車。不過偶然同爸爸夾到時間鬆一鬆，佢就會做司機載爸爸兜風。加讚話爸爸以前係佢嘅一本跑車字典，教佢駕馭跑車嘅技巧，不過依家就由佢update番畀爸爸。上年加讚收到蔡志明送畀佢架二千萬林寶，即刻載爸爸遊番轉。面對囝囝呢個林寶新手，爸爸上車前叮嚀要小心駕駛，落車後就大讚好feel，唔知佢係讚架車定係讚個司機呢？
早幾日黃塵鎖維港，好彩做善事有天公關照，前晚天氣好好，廿部林寶都唔使封塵。不過跑車始終耗油量大唔環保，所以一眾林寶會員都話好少喺香港揸，平時都係坐cc低嘅私家車或者公交代步。對於唔少人鍾意玩改車，林寶會會長Ricky話佢哋嘅會員唔會咁做，而且大家定期會運啲車去賽場玩，所以喺香港佢哋只會做安全守法司機。
卓妮