政情：高官議員玩手機iPad抗睡魔急call
今年施政報告貫徹政府頭痛醫頭、腳痛醫腳特色，為紓緩社會仇富情緒，用咗三分一嘅篇幅談房屋問題及協助基層市民置業，令報告宣讀時間延長到足足兩小時，搞到議事廳內好多行會成員、議員及高官們都悶到瞌眼瞓，要用盡各種方法去對抗睡魔急call。
坡妹露長腿險走光
施政報告首部分講房屋，大家仲頂得順，但讀到中至尾部，睡魔開始急call。坐喺公眾席上嘅行會成員「金刀梁」梁智鴻，不斷「釣魚」瞌眼瞓，瞓着之後又醒番。查史美倫就經常玩手機，由開場玩到完場。不過最奇怪係前中大校長劉遵義，佢經常點頭畀反應，唔通佢畀咗好多意見？
講到副局同政助，運輸及房屋局副局長邱誠武為免瞌眼瞓，經常抬高頭令自己精神啲，商務及經濟發展局副局長蘇錦樑就頻頻用iPad睇文件。最精神相信係民政事務局副局長許曉暉。有人發現，財經事務及庫務局政助「坡妹」伍潔鏇着裙露出長腿，但係佢坐唔定，不時更換坐姿，幾近失守走光。
至於議事廳嘅高官同議員一樣眼瞓到暈，財爺鬍鬚曾、保安局局長李少光、議員黃定光經常閉目養神，梁君彥又係玩iPad。唔想瞓着出醜又可以點呢？好似環境局局長邱騰華同多位議員就選擇中途離席抖吓氣。
尋日有近半行會成員及副局政助無去聽煲呔曾「念經」，諗落唔去都無乜損失。