政情：議員紛搞高鐵大專團
立法會部分建制派議員似乎對內地高鐵情有獨鍾，日前建議由廣州搭高鐵到武漢，再轉機到上海參觀世博，經濟動力及匯賢智庫又計劃喺四月舉辦大專生考察團，經濟動力早兩個月已開始籌備，難怪搶先一步喺復活節假期舉辦一日「世紀新視野」計劃珠三角考察團，仲以每位大專生一百元象徵式收費，結果參加者多到要三至四架旅遊巴至坐得晒。
經濟動力個考察團定於下月六日起行，林健鋒帶隊，由香港坐直通旅遊巴直達東莞，參觀經濟動力成員、廠商會副會長顏吳餘英開設嘅玩具廠，了解玩具生產流程，聽取工廠負責人分享港商喺珠三角經營面對嘅困難，仲會講埋人才需求及就業前景，廠方又安排大專生到工人飯堂食午飯，體驗工人生活。下午會由廣州南站搭高鐵到韶關，參觀城市規劃及景點。
相比之下，匯賢智庫嘅考察團較長途，到武漢考察三日，會參觀武漢大學、鋼鐵廠、農村建設及黃鶴樓等，但團費就要畀足二千五百八十元，即係主席葉劉淑儀無慷慨貼錢畀大專生。