政情：林健鋒借周松崗寸煲呔曾？
港鐵行政總裁周松崗（CK）周身刀，不僅領導港鐵有聲有色，對中國文學同《易經》亦好有研究。尋日佢應經濟動力邀請，到科大同一班學生分享吓人生哲理，仲借《易經》嘅六支卦教年輕人為人之道。
CK話，剛畢業嘅大學生，係「潛龍勿用」，佢哋仲未有足夠經驗，唔應該過分表現自己。當佢哋工作多十幾二十年，能力有所提升嘅時候，慢慢就會有貴人賞識。踏入中年之後，更要爭上位，成功嘅話就能夠「飛龍在天」。
不過，最後一卦，竟然係帶有負面嘅「亢龍有悔」，意即雖然佢哋已經攀上高位，但身邊嘅人一係唔服佢，一係只對佢唯唯諾諾，而有能力嘅人又離佢愈來愈遠，所以好快會跌番落嚟咁話。
佢講完之後，同場嘅經濟動力立法會議員林健鋒接住話，煲呔曾都應該嚟聽吓，唔知係想暗寸貴為特首嘅佢冇人服、遲早會玩完，定係純粹想搞爛Gag。本身喺港鐵統領千軍嘅CK仲話，作為一個領袖，最大嘅噩夢莫過於係冇追隨者同聽唔到反對聲音。其實煲呔曾依家不但冇追隨者，對所有反對聲音更是聽而不聞，睇怕呢個係香港人嘅噩夢至真！