政情：KK評兩會凍夾悶

ＫＫ話，兩會期間北京落雪兼刮北風，成個人凍到連個腦都僵埋，再加上今次兩會冇乜與香港相關嘅議題，搞到佢提唔起勁去開會，所以長達十日嘅會議喺又凍又悶中度過，怪不得每年都有人大、政協畀人影到開會時瞌眼瞓「釣魚」啦！

ＫＫ仲感慨依家唔少人大、政協當正兩會係一個一年一度嘅交際平台，唔少人朝早開兩會，夜晚就搞晚會，有時仲一晚幾個，同人食飯嘅時間分分鐘拍得住開會時間；加上開一次兩會動輒用成三萬工作人員，再計埋酒店住宿、膳食、場地布置等，開支高達數千萬元。佢建議，往後各區人大、政協留番喺原地開會，處理全國性議題時先用視像會議討論，再透過電子系統進行投票，等國家可以慳番啲資源，人大、政協就節省開會同應酬時間，一石二鳥。

陳鑑林唱反調

身為全國政協委員嘅林大輝唔係好認同ＫＫ嘅講法，佢話應酬係畀大家有個機會輕鬆啲交流，唔應該諗到咁負面，不過佢都認為開十日會太長，應該認真研究吓延長每日會議時間，盡量將開會日縮減到一星期就完美嘞！

不過，另一港區政協委員陳鑑林反而好珍惜兩會期間有機會同各地官員交流，話唔會視之為繁文縟節般嘅應酬，仲話兩會處理嘅問題嚴肅，唔應該用視像會議取代，佢反問：「立法會會議可唔可以用視像會議吖？」至於縮短會期，佢話中央已經從善如流，會期由原來嘅三星期縮到依家得十日，至於有冇需要再縮短，就要大家再研究吓先喎。