中環耳目：Olala一碗麵三蝦冧琦琦
身為上海人嘅名模琦琦，平時食嘢十分講究，最鍾意當然係家鄉上海菜，有時想食得簡單啲，都會去灣仔星街嘅Olala一碗麵開餐，最鍾意係佢哋其中一個招牌三蝦麵，麵採用正宗上海麵，麵身粗幼適中，食落煙韌彈牙又爽口。話明三蝦麵，就係分別用咗蝦仁、蝦乾同埋蝦湯一齊煮，再用上大量葱爆香，味道鮮甜，琦琦食到豎起拇指大叫：「好味！我最鍾意佢嘅蝦乾，味道好濃，而且好大隻。」
琦琦又仲好鍾意食呢度嘅春卷，皮脆餡靚，用新鮮生菜包住，口感十足。
Olala一碗麵嘅舖面雖然唔係好大，而且內裏裝置好簡單，但行嘅係高檔路線，唔係好多款式揀，仲獨沽一味只賣麵，其他就只有十幾款特別小食。不過佢哋嘅麵一點都唔平，三蝦麵就要一百五十蚊一碗，不過「一分錢一分貨」，雖然貴，間唔中食一次已令人回味無窮，難怪有不少名人明星捧場客，趙式芝、張敬軒、歐陽妙芝等都係佢哋嘅熟客。
