政情：林D9拉票 此路不通

場面滑稽 相當攞景

據現場直擊，造成今次「邪門」事件，全因民主黨太子總部地方淺窄，林D9同民主黨人結束會面，只得一個地方可以畀傳媒「扑咪」，咁啱背景係對封死咗嘅木門，於是電視鏡頭所見，林D9頭頂後面位置，赫然出現「此門不通」嘅提示字句，同前晚嘅「溝通」原意相映成趣，相當攞景。生意人講意頭，政黨、官員雖然毋須信邪，但從政治公關角度，咁滑稽嘅場面，都係可免則免！

政改大戰如箭在弦，議會之內左右陣營枕戈待旦，林D9晚探敵營，都係望同民主黨收窄分歧，為政改方案達成共識，點知撞正「此門不通」，真係大吉利是！大家如果細心啲，仲可以睇到「此門不通」下面有小字一行：「請由右邊門進。」唔通個天想提示港府，依家嘅政改方案太左，若想通過，一定要：右啲，右啲！

卡通公仔 不祥之兆

尋日我哋問番民主黨中人，有人對此奇景嘖嘖稱奇，反過來提醒大家，有冇留意「此門不通」標語下面，貼咗兩隻今年虎年先至新貼上去嘅老虎卡通公仔？此情此景，都變成政改「攔路虎」囉！成件事睇起上嚟，就好似冥冥中自有主宰一樣，成為政改方案成敗之戰嘅不祥之兆。

「凶兆」事件中呢兩隻政改攔路虎，到底所指何人呢？有人話係策動「五區公投」嘅公民黨同社民連，亦有人話，其實係民主黨內嘅強硬派。民主黨內對政改方案現分兩派，一方認為再搞對抗無前途，只要中央求其肯釋出善意就收貨；一方係強硬派如劉慧卿，堅持中央若唔讓步，民主黨亦寸步不讓，唔係民主派第一大黨招牌就會散晒。

不過，民主黨「文膽」張文光話，乜都唔係，兩隻攔路虎其實係二○一七年普選特首同二○二○年全面取消功能組別；如果唔成事，林D9嚟講乜都無用。