政情：田少莎姐搭高鐵吃狗不理
北京兩會曲終人散，有份上京開會嘅全國政協嘅自由黨前主席田北俊及「莎姐」周梁淑怡，趁上周五有半日空檔，孖住去試搭高鐵，由北京搭到天津；兩人早上十一時去到北京南站，由於乘客太多，逼住要搭四十分嗰班車，但高鐵好高速，廿八分鐘就抵達天津，仲夠時間食午餐，於是去品嘗天津地道嘅狗不理包，五種餡料包括菜肉、醬肉、蝦肉等，莎姐大讚好味。
莎姐尋日出席一項保障知識產權活動，大讚北京高鐵車站大堂靚得好緊要，媲美北京機場三號客運大樓；佢記得丈夫周明權以前經常穿梭於北京及天津公幹，每程車開足兩個幾小時，依家廿八分鐘就到，不禁驚嘆國產列車水平。莎姐爆料，話田少試搭高鐵時好興奮，搭高鐵期間獲悉自己連任旅發局主席就更加興奮，仲喺電話度大大聲同記者講自己搭緊高鐵添！
香港知識產權會及台灣著作權保護基金會合辦一項「知識產權」為題嘅短片製作比賽，身兼香港知識產權會主席嘅莎姐尋日主持啟動禮，佢話活動為年輕新一代提供交流機會，了解保護知識產權嘅重要性。