政情：議員借力狂省鬍鬚曾

早前香港足球代表隊揚威東亞運，身兼足總主席夫人嘅蘇菲梁隨即乘勢申請提出動議，促請政府延續東亞運佳績加強體育發展，但就抽籤輸咗畀另一位提出類似動議嘅議員。蘇菲梁最近終於抽中喺本周三提出動議，為免執人口水尾，佢將動議議題改為「增添動力促進社會向上流動」，提出七項建議協助基層市民尤其係青年人上位。

多人提修訂炒熱議題

蘇菲梁嘅動議吸引不同黨派共八位議員提出修訂，不過佢哋似乎唔止係關注社會流動咁簡單，而係借此機會對預算案嘅樓市同扶貧措施表達不滿。好似蘇菲梁提議透過活化二手居屋市場同重推首置貸款，協助年輕一代置業，但有分別六名議員提出修訂，要求加埋復建居屋落去，仲有提議放寬公屋上樓資格、重推出售公屋計劃、以及增加「限呎盤」土地供應等。咁啱日前首次有地產商同銀行家高調表態支持復建居屋，令有關議題愈炒愈熱，最後肯定會喧賓奪主變成辯論主菜。

除咗樓市問題，議員亦就加強支援貧窮家庭、增加青年人參與各個法定及諮詢組織、制訂滅窮同單親家庭政策、加強培訓六大產業人才、增加大學資助學額、成立青年創業基金、以至提供稅務優惠吸引外資等，隨時仲全面過鬍鬚曾嗰份預算案。一次過吸引咁多議員同議題，唔知蘇菲梁會覺得威水定係畀人抽水呢？