政情：搞亞運縮沙 曾德成扯白旗

早前嘅東亞運動會，雖然港隊成績唔錯，但硬件同配套上經常錯漏百出，例如唔畀觀眾即場買飛睇比賽，射箭項目更加因為比賽場館起唔成而要縮減大部分賽事。雖然問題多多，但本身應該受到政治問責嘅德成局長就好似當睇唔到，一味話東亞運搞得非常成功，仲開始將目光投放到亞運會，又指已經吸取籌備東亞運嘅經驗，相信香港絕對有能力搞亞運，加上預計啟德綜合運動中心會喺一七至一八年落成，德成局長信心爆棚咁認為到時就連場地嘅問題都冇，好似亞運已經水到渠成。

承認申辦運作有困難

不過德成局長尋日喺佢自己嘅專欄度，態度有一百八十度轉變，首先佢大數搞亞運會嘅三大困難，一嚟申辦嘅競爭好激烈，而香港又未必掌握到咁大規模嘅運動會，加上調撥資源搞大型活動其實好困難，所以佢嘅結論係要「實事求是」，先做評估再決定，唔可以輕率決定係咪申辦。德成局長講到咁，即係最後唔申請亞運嘅機率大增，佢之前嘅豪情壯語一時間唔知去咗邊。

其實德成局長今次講嘅三大困難，係香港一直面對緊嘅問題，並唔係忽然喺石頭爆出嚟，今次佢忽然將個難字放到無限大，強烈暗示唔搞亞運，到底係開竅諗通要再評估，定係間接承認咗佢之前過度樂觀，先至連最基本嘅問題都睇唔到呢？