政情：Eva鄭送花冧卿姐
立法會財委會主席劉慧卿喺高鐵撥款一役，受到部分建制派議員抨擊，質疑佢夾埋泛民議員一齊玩拉布，原來運輸及房屋局局長鄭汝樺（Eva）最初都係咁諗，但經過長達廿四小時嘅馬拉松會議後，呢兩位鐵娘子喺中途化敵為友，夾計令會議順利結束。
卿姐尋日講番高鐵一役中同Eva交手嘅內情，話開完第一次會後，Eva都係信唔過佢。其後立法會秘書長吳文華（Pauline）詢問過全體議員計劃提出嘅問題數目後，計算出只須開多一日半會就搞掂，不過Eva仍建議周五、六、日不停站開足三日會，但卿姐認為一旦預咗三日時間，班議員即使原本冇咁嘅打算，都一定可以講足三日，堅持只加開一日半會。
事實證明卿姐同Pauline嘅方法係啱嘅，難怪Eva喺撥款順利通過後，立即上前同卿姐握手道謝，喺之後舉行嘅立法會大會，Eva仲送咗一大束鮮花畀卿姐以表謝意，但卿姐望咗唔夠兩眼就轉送咗畀高鐵一役嘅幕後功臣Pauline，借花敬佛。