中環出更：李文俊買豪宅顧明均唱反調
強颱風鮎魚攻港不成，天色瞬間變回風和日麗，尋日沙田馬場更係人頭湧湧。呢排樓市炒到㷫合合，係咪已經見頂？名人各有妙論。理文造紙行政總裁兼執行董事李文俊原來月前斥資逾億元，購入何文田灝畋峰，擺明睇好後市；不過著名廠商南太電子創辦人顧明均就唱反調，大彈香港樓價貴到離晒譜，仲自爆從來唔買香港樓。
颱風鮎魚拜拜，馬場如常舉行觀瀾湖賽馬日，太子爺朱鼎健（Ken）日前驚颱風殺到，一早決定取消包廂請客。Ken朱自嘲無賭運，尋日雖然入場但齋睇唔買。
講到豐收，就非李文俊莫屬，愛駒「包裝選擇」跑第三，獲九萬多元獎金。李文俊呢排喜事重重，半年前第三度添丁，又喺何文田購入豪宅。佢笑言唔記得層樓買咗幾多錢，卓妮翻查資料，原來佢購入相連戶，作價一億二千萬元。近月樓市暴升，李公子層樓應該水漲船高，但佢笑言物業係買嚟自住，以便佢喺觀塘返工，冇理會升幾多喎。佢爸爸李運強亦都撐囝囝買樓有道理，話最緊要係量力而為。
張宇人囝囝代父拉頭馬
不過顧明均就無咁樂觀，佢自爆喺香港無樓揸手：「莫講話依家，就算早五年、十年前，我都覺得香港啲樓唔抵買。」到底邊位仁兄講得啱，卓妮好難評論。
事關世事難料，好似立法會飲食界代表張宇人（Tommy）咁，愛駒「越跑越有」喺主人缺席馬場情況下，爆冷勝出，袋逾三十六萬獎金。代父上陣拉頭馬有Tommy囝囝張士宗（Chris），佢話細妹十月十日喺香港註冊結婚，近日同爸爸返美國大宴親朋。愛駒唔見主人嚟捧場，扭計點都唔肯埋位影相，擾攘一輪後，騎師惟有撇低隻馬，自己埋位同Chris影相，真搞鬼。
卓妮