政情：陳唐芷青續掌積金局
政府尋日宣布再度委任金管局總裁陳德霖嘅太太陳唐芷青出任強制性公積金計劃管理局行政總監，任期三年，到二○一三年屆滿；如果計埋佢○三年署任嘅一年，陳太喺呢個位可以做足十年。
其實積金局行政總監呢個位好特殊，一方面由行政長官委任，但又係受薪職位，計算薪金、津貼同浮薪獎金，年薪超過五百幾萬，都唔知算唔算係公職好。陳唐芷青做過政務官，後來轉職醫院管理局，二○○○年跟隨前政務司司長許仕仁（肥龍）過檔積金局，○三年做署理行政總監，到○四年正式坐正，○七年再度獲委任，至今再度冧莊三年，可以話一帆風順。
政府尋日同時委任前大律師公會主席袁國強任積金局非執行董事，任期兩年。袁國強擔任上屆大律師公會主席期間，因為獲委任為廣東省政協委員而惹來爭議，但事件並無影響政府對佢嘅信任，去年已獲委任為司法人員推薦委員會委員。