政情：龐愛蘭寧進修唔補選
泛民玩五區總辭搞到要進行嘅補選，仲有差唔多十日就開始提名期，之前心大心細唔知選唔選好嘅沙田區區議員龐愛蘭（Scarlett）尋日轉口風話，依家成個補選嘅遊戲規則畀公社兩黨定咗就算，加上成個議題畀佢哋打造成只講政治、不談民生，變咗唔係佢杯茶，所以寧願花多啲時間寫博士論文好過，事關佢讀緊澳洲一間大學開辦嘅工商管理遙距課程。
Scarlett話無一個特別原因令佢改變諗法，只係見件事愈嚟愈唔對路，每個出嚟講打算參加補選嘅人，都被兩黨塑造成為「共產黨人」，Scarlett覺得咁樣好無謂，仲話共產黨都無乜唔好，不過唔想畀人過橋，先決定唔玩補選。其實身為新論壇嘅龐愛蘭都係建制派一員，建制派一致杯葛補選；佢放棄參選，都係意料中事。
唔玩補選，Scarlett話一樣咁忙，因為佢幫手做緊一套禁毒電影嘅總監，仲會客串做個十幾歲小朋友嘅媽媽。套戲六月上畫，大家想欣賞Scarlett嘅演技，不妨留意吓嘞！