中環出更：福建幫頭領「白宮」過中秋
一年容易又中秋，卓妮希望家家戶戶都可以「人月兩團圓」。尋晚中華總商會舉行十‧一酒會，中秋節氣氛相當濃厚，政商界名人都好開心講緊中秋節目。三位福建幫頭領、全國政協楊孫西、施子清及盧文端呢三個結拜兄弟，每年都會輪住到對方屋企過中秋，今年就輪到去楊孫西嘅清水灣「白宮」豪宅，三家人三代同堂共三十幾人，相信場面會好熱鬧。
施子清話今年嘅中秋好忙碌，臨近十‧一有好多酒會要去，十九日又要去北京參加一項活動，然後才回港過中秋。講起中秋節目佢好開心，話今年輪到三家人去楊孫西屋企過。講起月餅，施子清話福建同廣東嘅月餅好唔同，佢比較鍾意食廣東蛋黃蓮蓉月餅，仲話香港製造先至好食。不過，施子清好孝順，掛住屋企九十八歲高齡嘅媽媽，佢話媽咪年紀太大，唔會一齊去楊孫西屋企過節喎！
曾憲梓囝囝伴賞月
中總永遠榮譽會長曾憲梓同兩個仔智雄同智明尋日都有出席酒會，大佬智謀就無現身，不過三個仔都好乖，年年都會返九龍塘大宅過節，陪曾老過一個快樂中秋節。至於中總副會長「牛仔褲大王」楊釗就聲言要「還債」，乜嘢債要中秋節還呢？佢話自己過去幾十年掛住為事業搏殺，忽略咗健康同家人，所以中秋節目一定係返屋企陪家人，平時就盡量抽時間行山做運動。
卓妮轉個頭又見到中總會長蔡冠深。蔡會長話，佢屋企有七兄弟姊妹，佢排行第三，如果大家都身在香港，會一齊去佢屋企食飯過節，而且各人會帶一碟餸嚟開餐；不過佢話太太關穎琴好少煮餸，通常會請人煮鮑魚畀大家食。講起細個點樣過中秋節，蔡會長話自己都有食月餅同玩燈籠，依家就睇住啲小朋友食雪糕月餅同玩燈籠，一樣咁開心。
全國政協常委陳永棋就會喺中秋節翌日同太太外遊，先去日本北海道，然後再到俄羅斯，途經海參崴，再到北京參加酒會，下月四日先至返港。棋哥早前話已將手頭餘下亞視股份出售，卓妮問佢收到錢未，佢話仲未收到，只係好少錢啫，又話同亞視十幾年感情，希望亞視將來做得好啲。
卓妮