中環出更：連捧星雲場梁愛詩似粉絲
星雲大師近日旋風式訪港，前日攞完港大頒發嘅名譽博士榮銜後，尋晚再度現身港大講佛偈，吸引近六百名「粉絲」捧場，全院滿座。基本法委員會副主任梁愛詩最捧場，一連兩日慕名而來。佢話大師講嘢充滿人生哲理，即使唔係佛教徒都好啱聽。
「任何困難總有解決辦法」
星雲以「禪學悟境的意義」為題開金口講道，只此一場，詩姐如小粉絲般一早到場，佢否認係星雲弟子，咁勤力，全因年前拜讀星雲嘅作品後頗有共鳴，可惜一直冇機會現場聽大師講道，今次梗係咪走雞。梁愛詩話，大師好強調人與人之間相處要和諧，講道夠入世，最受用嗰句係「任何困難總有解決辦法」，好受鼓舞喎。
講番星雲同港大，可謂淵源甚深。○三年佢曾出席該校佛學研究中心圖書館開幕禮，之後幾年經常到港大主持公開演講，難怪身為主人家嘅港大校長徐立之及港大佛學研究中心管理委員會主席李焯芬，尋日由頭坐到尾。
星雲講道已達出神入化境界，手中雖無講稿，卻可以講足粒幾鐘，依然引來爆笑連場。大師謙稱唔係乜嘢師傅，相反千千萬萬嘅信眾至係佢老闆，因為每次建佛寺，全靠善信慷慨解囊喎。
卓妮