鄉議局主席劉皇發年初二喺車公廟求得「先難後易」中籤，勢估唔到最快應驗籤文嘅係「新食神」葉澍堃（Stephen）。農曆新年最好係打番幾圈，立法會議員「大舊石」石禮謙年初七就上咗Stephen屋企打台灣牌，諗住發新年財，點知變成財神送錢，畀Stephen一家贏三家，好彩打得細，激戰八圈牌後，Stephen只袋咗六百元。
不過，Stephen最雀躍係開頭幾圈仲輸緊三千幾元，但後來時來運到，倒贏六百元，於是諗起發叔求得嗰支「先難後易」中籤，如今打牌都係先輸後贏，認真靈驗。大家可能會話：「咁啱嘅啫！」但Stephen呢股「先輸後贏」運勢延續到初八賽馬日，原本佢喺第五場仲輸緊，但到跑第九場竟然反敗為勝有得執，唔到你唔信！
講開打牌，馬會主席陳祖澤太太都係麻雀愛好者，運氣指數極高，過去連最難食嘅天胡、地胡都食過。不過，陳太逢農曆新年都好忙，未有時間約保良局班太太打牌，睇怕都要遲吓先至可以再開局嘞！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |