中環出更：發迹地重建扮嘢文滿肚計
蘭桂坊係本港嘅熱門蒲點，唔少老饕、酒客同遊客都慕名而來，親身感受呢個愈夜愈旺嘅不夜天。講起蘭桂坊，不得不提有「蘭桂坊之父」美譽嘅盛智文（扮嘢文），佢一手令呢個地點變成人人趨之若鶩嘅蒲點同旅遊景點。最近佢又行前一步，決定將兩幢令佢發迹嘅大廈重建，確保呢度繼續做蘭桂坊龍頭。
扮嘢文一九八八年喺蘭桂坊首先購入加樂大廈，隨即引入各式各樣嘅食肆、酒吧、俱樂部，令呢處漸漸旺起嚟。扮嘢文後來喺一九九二年買埋旁邊嘅加州大廈，自此呢兩座大廈漸漸成為蘭桂坊嘅地標，而扮嘢文喺蘭桂坊嘅地位亦愈來愈穩固，仲做埋「蘭桂坊之父」添。
加州、加樂兩幢大廈可以話係扮嘢文嘅發迹地，不過呢兩幢「蒲友」勝地即將拆卸重建，扮嘢文打算將兩幢大廈合而為一，起一幢廿五層高嘅全新地標式建築物，當中十四層做食肆，其他樓層就做寫字樓。扮嘢文話，佢會租出部分飲食樓層，自己亦會營運幾間，但因為顧客口味經常轉變，所以暫時未諗到會做邊一類餐廳。扮嘢文好細心，佢話所有飲食樓層都會預留陽台或室外空間，等煙民喺唔影響其他人嘅情況下食煙。
改造蘭桂坊地標增競爭力
兩幢大廈係扮嘢文發迹地，依家要拆唔知有冇咩感想呢？扮嘢文承認對呢兩幢物業充滿感情，不過因為加州、加樂兩幢大廈都開始舊，為咗加強競爭力，今次不得不重建。佢話，依家香港娛樂場所面對來自世界各地嘅競爭，以內地為例，娛樂場所裝修美輪美奐，為咗令蘭桂坊保持娛樂勝地嘅龍頭地位，今次工程非做不可。
我哋好心急想知新大廈改咗名未，扮嘢文笑住咁答未有咁快，依家距離新大廈落成仲有兩、三年，不過佢好有信心呢幢建築物可以再次成為蘭桂坊嘅地標，佢亦會努力引入唔同具特色嘅餐廳酒吧，總之就肯定不辱「蘭桂坊之父」嘅美名啦！
卓妮