工作時認真又嚴肅嘅王守業上台致辭時，娓娓道來當年追求佳人韻事，大方直呼太太做Sweetheart，更向太太母校嘅Sister們作九十度鞠躬以表敬意。如此愛屋及烏，卓妮都感動到眼濕濕。

瑪利諾修院學校地靈人傑，出產唔少成就卓越嘅美女校友，九龍區唔少「木門對木門」嘅男生都喜歡同佢哋結緣，不過王守業伉儷嘅浪漫情緣就發生喺王太做老師嗰時。話說王太當年喺瑪利諾修院學校讀完小學，就過咗海去當年藍塘道嘅瑪利諾書院繼續學業，前後讀咗十一年，再到美國升學。直至畢業回港後，王太返母校教書回饋，機緣巧合喺鄉村俱樂部邂逅拔萃畢業嘅王生。

媽打求學期唔敢拍拖

為求佳人，王生每日風雨不改去學校門口等王太放學，即使畀王太嘅學生「圍」都無退卻。咁有誠意，最後成功打動嚴小姐成為王太！估唔到咁多年後王生又出冧招，今次唔使再企門口，仲「升呢」上台添。王太話事前唔知老公有呢段講詞，聽完感動又驚喜。

另一位瑪利諾女兒余黎青萍亦有專為牙齒做美白嘅老公余其祥相陪，余生陪住依家係小學部校監嘅太太坐足全場，仲充當攝影師幫太太同嘉賓、校友影相，認真唔話得。

至於身為「大媒人」嘅媽打李麗娟，為母校不遺餘力，連王守業夫人都要喺台上公開多謝佢。媽打話佢喺學生時代有唔少名校嘅男生爭住要識佢，不過由於家訓講明中學生不可以談戀愛，所以媽打唔敢抗命，但就算同班男生做唔成情侶，都可以做朋友啫，依家仲同以前嘅朋友仔保持好好關係，有時約埋對方嘅太太一齊食飯聯誼添。

85周年活動出信用卡

瑪利諾修院學校小學部校長羅曾潔貞話，今次推出信用卡，其實係學校八十五周年誌慶活動之一，聽日（廿一日）學校仲會喺灣仔會展筵開一百八十五席慶祝，嚟自全球各地嘅校友濟濟一堂慶祝兼做善事，扣除晚宴所需支出，餘款將捐畀瑪利諾修院。

卓妮