【本報綜合報道】NBA交易截止日，紐約人成為最活躍分子，球隊最後關頭加入帝王及火箭嘅交易，獲得即將完結合約嘅麥基迪，另送走三屆入樽賽冠軍尼特羅賓遜到塞爾特人，換入三分射手艾迪侯斯。紐約人明顯已為今夏迎接「大帝」勒邦占士而早做好清洗準備！

紐約人成功與帝王及火箭完成三方交易，紐約人得到火箭球星麥基迪，另與火箭交易2012年選秀權（狀元簽受保護）及獲得帝王控衞洛迪古斯，火箭就換入帝王嘅奇雲馬田同埋曉頓岩士唐、紐約人兩名前鋒佐敦希爾、謝菲利斯及2012選秀權（前五名受保護）；帝王則獲得火箭嘅蘭特利、杜斯及紐約人後衞拉利曉士。

尼特羅賓遜送去塞爾特人

紐約人同時送走剛喺明星賽周末成功衞冕入樽賽嘅尼特羅賓遜，尼特會幫塞爾特人爭標，而艾迪侯斯、基頓斯及獲加就會登陸紐約。紐約人今次都算如願以償，因為麥基迪嘅合約即將到期，而球隊送走拉利曉士、佐敦希爾及謝菲利斯後，足足騰出2,250萬美元薪酬空間，預計球隊嘅薪酬空間會多達3,000萬美元，喺今夏簽自由身球員，足以羅致包括「大帝」在內嘅兩位頂薪球星。