金屬鏈、菱格紋嘅香奈兒Chanel手袋，堪稱「包中之王」，名媛淑女嘅衣櫃內，唔少得一個香奈兒，東區區議會主席丁毓珠就獨愛經典嘅Chanel 2.55手袋。
丁主席尋日以香港婦協副主席身份，出席喺灣仔舉行嘅婦女響應全城清潔運動，手挽一個深藍色Chanel 2.55，佢話個手袋年前購入，售價逾兩萬元，用佢配襯套裝出席公開場合夠晒高貴大方，加上格數多、容量大，摷起銀包或卡片就手到極。
2.55嘅經典故事可追溯至一九五五年，香奈兒創辦人Coco Chanel，喺當年二月推出一款配有金屬鏈嘅翻蓋可閉合式方形手袋，一鳴驚人，成為人所共知嘅2.55，美國第一夫人Jackie Kennedy及荷里活巨星無不以佢相伴左右。丁毓珠都係粉絲，珍藏唔止一個Chanel手袋。新年將至，丁主席計劃同家人去新加坡玩番三幾日，行吓動物園呼吸新鮮空氣。
卓妮