政改諮詢進入最後倒數，政府近日不惜出動各政策局局長同政制及內地事務局局長林瑞麟，「行孖必」出席各行業嘅政改諮詢論壇，好似早前運輸及房屋局局長鄭汝樺就出席咗工程界嘅政改諮詢會，尋日就輪到商務及經濟發展局局長劉吳惠蘭（Rita）出動。
不過，尋日咁啱自由黨立法會議員方剛先喺油麻地搞批發及零售界政改諮詢會，之後同經濟動力關係密切嘅香港總商會又喺金鐘搞另一場政改論壇。
大家都知道3L脫離自由黨成立經濟動力之後，因為兩個組織嘅選民對象都係中產同商界人士，所以佢哋已經由黨友變成競爭對手，依家兩個陣營同日搞政改諮詢，咁就搞到Rita喇。
Rita唔知係咪怕順得哥情失嫂意，所以方剛個諮詢會明明五點先完，但佢喺會議進行到一半就離開，趕住準時出席總商會六點鐘舉行嘅論壇。睇嚟政府要搞好政改，除咗出動局長向業界解畫之外，仲要睇通政治形勢搞平衡，以免得失任何政黨。