03/02/2010

播放本新聞相關短片

高比仔膺湖人史上得分王

高比仔又創紀錄!佢尋日帶領湖人作客灰熊時狂轟44分,累積25,208分,超越名宿謝利韋斯,成為湖人史上「得分王」。不過,湖人喺呢場波以93比95不敵灰熊。

賽前以28分落後湖人史上首席射手謝利韋斯嘅高比仔,在第三節成功入樽攞到第29分後,廣播正式宣布高比拜仁已打破謝利韋斯嘅得分紀錄。高比仔賽後難掩興奮:「能夠成為湖人史上得分王,對我嚟講絕對係一項重大榮譽,因為喺榜上嘅全部都係偉大球員。當我17歲嘅時候,謝利韋斯教識我好多嘢,佢向我展示點樣比賽、跳投、轉身。雖然我喺史冊上成功超越佢嘅紀錄,但呢個紀錄其實係我哋嘅,係魔術莊遜同其他偉大球員一齊擁有嘅。」

兩分負灰熊 美中不足

美中不足嘅係湖人尋日輸波,主場嘅灰熊憑首度入選明星賽嘅蘭度夫攞到22分同17個籃板球,加上另一主力基爾獨取25分,最終以95比93,兩分之微爆冷擊敗湖人,終止對方4連勝紀錄。

聽日湖人會返主場對山貓,以湖人今季主場有23勝3負嘅佳績,只要高比拜仁繼續發揮水準,相信可以輕鬆重返勝利,讓11分嘅上盤仍然值得捧場。

■本報綜合報道