本文重點
一條好披肩，好比女人身上第二層肌膚。著名舞蹈家王仁曼就獨愛產自肯尼亞嘅Anna Trzebinski手做披肩，貪佢獨一無二。王校長着衫唔興跟風，佢話香港人唔多認識嘅名牌，反而啱晒佢。
藝術家天生有扮靚觸覺，王校長前晚出席英國皇家舞蹈學院頒授院士榮銜時，放棄着傳統旗袍，改為披上一條長及膝頭嘅黑色Anna Trzebinski大披肩，王校長將披肩打斜搭上身，喺右肩打個結，令披肩睇落似外套又似連身裙，最別致係披肩尾部繫上一撮撮色彩斑斕嘅雀毛，飄逸到極！
戴法國Poiray鑽錶
香港人對Anna Trzebinski品牌較陌生，王校長就盛讚呢位設計師才華洋溢，可惜香港暫時未有得賣，佢趁對方有次帶同披肩來港交流時，花費五位數字掃貨。佢話一條質料上乘嘅披肩可用上好幾年，貴啲都值得。
王校長挑選手錶同樣刁鑽，唔揀街知巷聞嘅名牌貨，獨愛法國名牌Poiray手錶，當日戴上一隻價值逾十萬元嘅Poiray鑽石錶，佢話每次去巴黎旅行都會火速掃新貨，屋企至今珍藏數隻Poiray錶，得閒轉吓款！
卓妮