政情：吳文華捱鬧水洗唔清
立法會上星期三辯論「釋放劉曉波」動議，秘書處按新做法為議員提供「貓紙」，即參考資料文件，但內容精簡到只得一頁紙，比同日辯論點樣保護貓狗嘅動議少三頁，被批評係對劉曉波嘅侮辱，視劉曉波「連貓狗都不如」，引發政治風波。秘書長吳文華（Pauline）尋日上內會解畫，指新做法係得到立法會行政管理委員會支持，又話份劉曉波參考資料係由研究部擬定，佢當時見到都覺得太簡短。Pauline畫就解咗，至於解唔解到圍，就睇民主派議員放唔放過佢嘞。
「釋放劉曉波」動議引發嘅貓紙風波，餘波未了，「大舊」陳偉業尋日喺內會追究，質疑秘書處「自我審查」，見劉曉波事件涉政治敏感，連提供參考資料都「縛手縛腳」，要求將呢個實施僅一個月嘅新制廢除。其他泛民議員亦加入聲討，指事件令立法會形象大打折扣，總之人人都想將呢個新措施送上斷頭台。
Pauline身為秘書處之首，頓成眾矢之的。佢尋日上內會解畫，強調「貓紙」措施得到立法會行管會支持，事關行管會早前通過秘書處建議嘅一系列協助議員行政措施建議，當中包括呢項新做法。至於劉曉波份資料，係由研究部嘅同事負責，佢收到後嘅第一個感覺，就係心裏都問：點解份資料咁短嘅？不過，Pauline話整份參考資料交咗畀研究部做，即係下放咗權力，佢聽過解釋後都接受咗嘞。佢強調秘書處立場中立，處事公正。
Pauline尋日解畫，好似責任全部唔上身。不過，Pauline作為秘書處阿頭，研究部嘅「出品」有問題，佢都責無旁貸。其實，劉曉波嘅資料，好似「貓紙」欠奉嘅《零八憲章》，上網一摷就唾手可得，甚至如雪片飛來，要加番上去，都唔係咁難啫，問題係Pauline有冇落柯打呢？
議員建議檢討措施
本身係行管會成員嘅「卿姐」劉慧卿話，佢之前無聽過秘書處有呢項新猷，但點都好，建議秘書處都係息事寧人，將新措施廢咗算數。自由黨主席劉健儀亦話，無印象行管會討論過叫秘書處出「貓紙」，但佢為Pauline說項，話覺得秘書處「有啲無辜」，言下之意未必係政治審查，建議秘書處三個月後好好檢討新措施。睇嚟Pauline三個月後，都要揮慧劍親手處決呢項「貓紙」制度囉。