政情：梁家騮開檔不求「升空」

立會對面做基地

梁氏兄弟揀咗喺立法會對面嘅太子大廈做基地，診所接近一千呎，裝修費相信無六位數字都落唔到樓，之前怪醫話相信佢喺醫管局份公積金，都夠畀開業費喎。早前我哋撞到返立法會開會嘅怪醫，話預計診所十一月中就可正式開業。好多名醫自己開業之後，連穿梭機都唔使搭就直接上咗「星球」同「月球」，閒閒哋一個月、甚至一星期就搵一百萬。不過怪醫就謙讓話，我仲未離開地球，但求開業後維到皮都開心。

卓妮問佢想唔想早日「升空」，點知佢笑笑口拒絕：「阿彌陀佛，唔諗呢啲嘢！」咁又係，怪醫做外科，要攞呢張升空登機證，即係意味着好多人唔舒服要開刀，怪醫果然係醫者父母心。