離開官場去咗港大教書嘅前公務員事務局局長王永平，尋日出席港大「中國傳統倫理與宗教研究計劃」記者會，大談應該向後生仔教多啲中國傳統倫理道德。佢仲話自己不時寫文章發表意見鬧政府，就係要好似以前擔任諫官嘅士大夫咁，鬧醒班港府高層要體察多啲民情添！
平叔話，中國幾千年傳統文化有唔少好嘢，佛家道家講唔好殺生、清靜無為，更比時興嘅環保同保護瀕危物種早幾千年。佢睇《論語》時亦發現，孔子本人一啲都唔死板，係後來儒家思想畀統治者高舉「君君臣臣父父子子」先變成管治工具。佢仲語帶雙關咁話，儒家一早就有「民為貴」嘅概念，如果掌權者愛民如子，為官者無懼直諫，又點會出問題呢？
平叔仲話年輕人有理想、有激情係好正常，雖然未必百分百啱晒，但社會以至掌權者都應該包容佢哋。平叔更直言有人話依家後生仔行為激烈，「咁五四運動嗰陣咪仲激」，暗諷曾批評後生仔嘅煲呔曾未見過世面。