上季總冠軍湖人尋日繼續作客之旅，面對多年宿敵塞爾特人，雖然高比拜仁表現唔穩定，加上上半場扭傷足踝，但呢位巨星勝在喺關鍵時刻趕及「回魂」，最後一擊跳射得手助湖人反勝「綠衫軍」九十比八十九，繼續追逼騎士嘅聯盟一哥位置。

高比仔自從手指受傷後，表現一直欠穩定，今場面對「綠衫軍」亦繼續飄忽，全場起手二十次只中八球，同時有四次失誤。雖然如此，高比仔仍然係贏波英雄，皆因賽事剩餘七點三秒時，佢單挑雷阿倫跳射得手，協助湖人反超一分，及後雷阿倫最後一擊射失三分球，最終湖人險勝九十比八十九，取得四連勝。

金塊作客贏馬刺，基斯安達臣（左）被馬刺貝理雅「打荷包」！（美聯社圖片）	籃網不敵76人，易建聯（中）慘被76人球員「上下其手」！（美聯社圖片）	前ＮＢＡ球星馬貝利（左）首次代表山西隊在ＣＢＡ上陣，但山西隊主場以一○一比一○二不敵東莞。（美聯社圖片）

起手次數登聯盟第13位

高比仔賽後承認，今場被雷阿倫嘅緊迫防守搞到透不過氣，加上足踝痛楚影響表現，但最後仍慶幸贏波。另方面，呢位紫金戰神累積起手次數已達一萬九千二百四十三次，正式超越摩西馬龍及伊榮，躋身ＮＢＡ史上起手次數排行榜第十三位，而高比仔只要在未來再攞多二十八分，就可以力壓名宿韋斯，成為湖人史上得分最多球員。

基斯保羅膝傷無緣明星賽

有人歡喜有人愁，高比仔嘅夢八隊友基斯保羅就認真慘情，佢早前對公牛左膝蓋軟骨撕裂，將要進行手術，預計「蜂王」要養傷一至兩個月，亦代表佢肯定錯過今個月嘅明星賽。

■本報綜合報道