本文重點
千億新抱徐子淇誕下兩位小公主後專心相夫教子，行街買嘢都掛住屋企人，子淇尋日親自出馬，去中環太子大廈買銀器。銀器餐具多數用於王公貴族嘅上流社會，外國人向來重視餐桌擺設，認為有美麗餐具相伴，可以營造愉快用餐氣氛，睇嚟子淇好想做個美麗模範主婦喎。
尋日晏晝五點，子淇以一身貴氣白領麗人look，手挽黑白斑馬紋手袋現身太子大廈，呢趟出動唔係掃靚衫，而係逛精品家具店。卓妮所見，子淇拖埋媽咪一個箭步走入高尚家品店EXCLUSIVITES，保鏢則喺門外把風，當時店內仲有其他客人，為免引起哄動，子淇揀嘢揀得非常低調。
徐媽媽在旁幫眼
卓妮見佢主動走埋一角，靜雞雞叫售貨員攞咗幾隻銀碗同銀碟畀佢睇，徐媽媽就喺旁邊幫吓眼。以純銀碟為例，一隻就盛惠千四蚊。
講究飲食藝術嘅人都知，銀器餐具高貴優雅，散發如月亮般迷人光芒，除咗係歐洲皇室御用餐具外，香港上等人都愛用佢。至於子淇，或者平時都用慣用熟，所以只需五分鐘，就埋單走人。
雖然保鏢叮囑守候喺店外嘅記者唔好影相，但子淇步出店舖時非常友善，只係用左手保護小腹免得人多撞親，咁緊張?唔通又有喜!?卓妮上前問佢揀咗啲乜?子淇笑笑口話:「都係啲家居用品喇。」然後急步離開，但佢頻頻回頭望向尾隨嘅媽咪，對老人家咁細心，抵老爺咁錫佢。
子淇喺保鏢嘅陪同之下，與媽咪登上座駕走人，完全係一幕「千億新抱旋風掃銀器」。
卓妮