老人家教落︰「無功者飯餸不留」，意思即係叫嗰啲好食懶飛嘅家庭成員食自己。反對派政棍有破壞冇建設，禍港殃民仲可以高薪厚祿袋袋平安，簡直冇天理！
反對派係又拉布唔係又拉布，無所不用其極，好似上個禮拜咁，佢哋多次衝擊主席台，又同保安推撞，場面混亂下會議多次叫停，之前多次製造流會嗰筆，更加不在話下。鍾意就做吓騷反吓枱，鍾意就遲到早退，換轉普通打工仔，一早畀人炒咗魷魚，作為老闆嘅納稅人居然吹佢哋唔脹，唔氣頂就假。有人尋日就獻計，流會時唔在席嘅議員捐出當日薪金，睇吓仲有冇人敢玩嘢！
呢嗱，真係有得諗o架！最近有大學民調顯示，反對拉布嘅受訪市民多達六至七成，支持嘅得一成半；反對派日前就反修改《議事規則》吹雞集會，結果得嗰二百人響應，可見無良政棍失道寡助，流會扣人工，直頭講得係順天應人；更何況，「罰俸」呢一招外國早就有人諗過，美國有眾議員提出「No Show，No Pay」法案，缺席投票議員不得領取當天薪水；加拿大、新西蘭等議會亦有類似制度。呢啲之唔係反對派奉為圭臬嘅國際標準囉！
有反對派政客懶義正詞嚴咁話，如果下星期流會就捐份糧出去。真係唔知嘅嚇死知嘅笑死。垃圾會議員出名有着數舔到盡，免費海外考察、議員助理以至辦公室用品等各式津貼……少個崩都同你死過，流會捐人工喎，三歲細路都唔信。再講吖，天下烏鴉一樣黑，如果唔係建制派議員蛇王開小差，對家突擊點人數就唔會頻頻得手，扣人工咪盞搞埋自己。
當然喇，反對派瘋狂拉布搞到成個香港雞毛鴨血，區區扣人工絕不足以抵其罪。有人計過數，反對派喺上屆立法會財委會發動拉布戰，最少浪費二十八億元公帑。唔使講第樣，淨係拉布搞到大型基建嚴重延誤，建造業工人唔係飯碗不保，就係三日打魚兩日曬網，認真多得班瘟神唔少。
所以話，要堵塞政棍拉布漏洞，讓議事堂重回正軌，治本之道始終係修改《議事規則》。大家有眼見，反對派政客呢輪玩嘢拉布變本加厲，明顯係玩拖字訣，寄希望於出年補選重奪「關鍵少數」。而反對派氣急敗壞，上竄下跳，連驅趕記者出議事廳都夠膽死，亦足以證明修改《議事規則》呢招威力龐大，一嘢踢中佢哋腎囊。
機不可失，時不再來，剪布一有民氣可用，二有票數優勢，建制派係時候一鼓作氣「滅此朝食」，做番齣好戲！