一不離二，二不離三，澳門政府管理不善，醜聞不絕，沒有最混帳，只有更混帳，官僚無能程度比清朝有過之而無不及！
呢嗱，話口未完又嚟嘞，話說有澳門公務員喺衞生局轄下機構申請免費「餵哺母乳證明」，亦即俗稱嘅「餵奶鐘」，被誤當申請醫療報告，遭索取費用，據聞類似個案達六次之多。衞生局呢鑊衰到應一應，惟有死死地氣退款致歉，但跌落地都要揦番拃沙，強調市民申請「餵奶鐘」，如果直接向掛號處申請，有機會被誤以為申請醫療報告而被收取費用，咁即係點？即係市民自己死蠢「唔知碇」，完全唔關官老爺事囉。
有當地立法會議員就講得啱嘞，澳門衞生局行政管理出名混亂，尤其近年公共醫療急速擴展，令問題更加突出，相信今次事件只係冰山一角，呼籲當局盡快堵塞漏洞，防止類似事件重演。
講真，澳門官僚阿茂整餅，冇嗰樣整嗰樣，想唔出事都難。當局推出「餵奶鐘」，原意係向僱主發放證明，等餵哺母乳嘅員工可以每日放假一小時，查實真係有心為餵母乳媽媽提供職場友善環境，邊使搞咁多嘢，乾脆學吓美國就得，人哋一早就立法規定僱主必須設立哺育室，等女員工可以定時放低手頭工作泵母乳及冷凍儲存。係人都知，管理學上有所謂「梅菲定律」，凡可以出錯嘅環節都會出錯，澳門官僚自己知自己事，官員質素低成咁，多一重行政手續咪盞多個機會賴嘢。
講開澳門政府嘅糊塗帳，真係三日三夜都數唔完。早前外國醫學界人士一行七人由澳門返港，期間一名隨從被在場一名男子挑釁，話佢哋打尖並發生推撞，結果海關人員不由分說將其他無辜成員一併扣留，期間仲要態度惡劣，結果擾攘近兩粒鐘至解決。咁簡單嘅旅客糾紛都搞到小事化大，而且處理時不問是非黑白，除咗反映前線關員連最基本嘅執法都唔識，嗰種「揸住雞毛當令箭」、一味擺官威嘅醜惡嘴臉亦都表露無遺。即使係芝麻綠豆小官，一朝權在手，便把令來行，鍾意刁難邊個就刁難邊個，唔滿意pop我吖笨！話澳門官僚「衰過清朝」，就係咁解。
咁都未算離譜吖。海關今年七月接連爆出兩宗倒掛五星旗事件，當局起初死撐相片移花接木，之後雖然跪低，但調查工作拖到依家都未有下文，話唔係官官相衞，三歲細路都唔信！
有人形容澳門表面歌舞昇平，內裏烏煙瘴氣，係典型嘅金玉其外，敗絮其中。查實澳門有晒天時地利，對上有中央照顧，對內冇「澳獨」勢力同反對派搞搞震，一副十三么好牌都打成雞胡爛牌，真係多得班廢官唔少！