天下烏鴉一樣黑，澳門接連爆發退伍軍人症，當局檢查化驗樣樣慢幾拍，被批評衰過清朝；本港有女生患肺癆要強制隔離，官老爺臭屎密冚，乜嘢詳情都唔肯公布，搞到人心惶惶，簡直係五十步笑百步！
係人都知，肺癆傳染性高，萬一喺社區爆發，絕對唔係講玩，特別係湖南、上海等內地省市最近陸續出現疫情，唔該官老爺打醒十二分精神。講開又講，除咗肺癆之外，專家預計嚟緊農曆新年係冬季流感高峰期，衞生官僚一樣唔可以瞌眼瞓。食衞局局長陳肇始尋日拍晒心口大派定心丸，強調當局已經準備就緒，一直監察情況；又呼籲長者、小朋友、孕婦及長期病患者等高危人士盡快接種流感疫苗。到底當局係咪真係ready，大家都係聽住先好啲。
唔講第樣，就講疫苗。大家可能仲記得，一四/一五年度冬季流感季節，當時嘅H3N2流感出現變種，導致疫苗保護力得番四成左右，結果造成近五百人死亡，可想而知疫苗入錯貨有幾可怕。前車之覆，後車之鑑，歷史會唔會重演，當局有必要講清講楚。
疫苗係咪對症下藥係一個問題，夠唔夠貨又係另一個問題。你知喇，香港畢竟係彈丸之地，訂貨量有限，好多時要向藥廠「乞」至有貨，醫學界人士近年大聲疾呼，有人建議香港發展醫藥製造業，唔使下下仰人鼻息，結果又係民熱官冷，「講人自講」。好嘞，就當疫苗啱使兼供應充足，前排媒體踢爆當局對私人診所等機構嘅儲存設施冇監冇管，疫苗失效隨時冇人知，有關漏洞一日唔堵塞，講咩都嘥氣。
仲有吖，接種疫苗只係防疫第一線，公立醫院病床、醫護人手配合需求至係關鍵。呢嗱，陳局長自己都認，隨着本港人口急速老化，入院人數增加，即使並非流感高峰期，公立醫院床位爆滿情況亦已相當嚴重，其中骨科及內科等更加係重災區。講出嚟嚇親人，本年度醫管局計劃增聘二千一百名護士，截至十月只係請到約一千六百人，缺口高達四分之一，都咪話唔誇張。
喺度功夫茶真係要溫馨提示大家，千祈千祈千祈，洗手洗手洗手。事關當局增加公院前線人手苦無良策，唔係增聘學護填氹就係要求醫護人員加班。十個煲得七個蓋，醫護忙中出錯，流感唔攞命醫療事故都攞命，今年夏季流感高峰期間，公立醫院超負荷嘅亂象，市民見過鬼都怕黑。所以話，大家記得保重身體，自求多福。
黃台之瓜，何堪再摘。依家香港社會問題已經夠多，再有疫魔來襲，分分鐘大鑊過沙士吖！