有人話，港府坐擁金山銀山，窮得只剩下錢，真係一啲都冇講錯。呢嗱，淨係計地價收入，港府今年頭八個月，已經穩袋破紀錄嘅一千二百幾億，預計全年盈餘將連續第二年突破千億大關。可惜吖，港府一方面庫房水浸，另一方面善財難捨，連提供託兒服務咁基本嘅嘢都做唔好，衍生唔少悲劇，簡直係對香港呢個富裕社會嘅莫大諷刺。
呢，四歲女童被虐重傷，搞到要入ICU，就係典型個案嘞。稚子何辜，小朋友喺獄中出生，身世已經夠可憐、夠悲哀，加上母親經濟環境又唔好，經常居無定所，最弊仲係所託非人，居然將一對孖女交畀狼心狗肺嘅囚友「照顧」，結果搞成今日咁，直頭可以話悲完再悲，悲上加悲。
講真，呢單倫常慘劇唔單止係個人嘅不幸，更加凸顯政府嘅失職。據講幼童母親同嗰位囚友都有服用藥物惡習，橫睇掂睇都唔適合照顧幼童，如果有公家提供嘅託兒服務選擇，相信個阿媽都唔會出此下策，一場悲劇完全可以避免。唔講港府託兒服務猶自可，一講當堂火都嚟埋。正如有立法會議員話齋，雖然港府一直聲稱託兒服務充足，實際上卻係嚴重供不應求，而「社區保母」服務更加係形同虛設。官不虐伯仁，伯仁因官被虐。講得難聽啲，政府喺成件事上根本就係幫兇！
話時話，港府成日叫人生三個，又話咩「高齡海嘯」，查實淨係託兒服務不足一個問題，已經令唔少雙職工家庭卻步；最離譜嘅係，港府懶理市民需要，鼓勵生育零配套，反而一度諗住引入雙非童作為人口生力軍，捨本逐末，捨近求遠，結果咪唔衰攞嚟衰，激化中港矛盾，為港獨火上加油囉。
講番呢單畸士，開講都有話預防勝於治療，查實社署一直有人跟進三母女嘅住屋問題，但就冇跟進託兒問題，做啲唔做啲，就係咁埋下禍根。社署官僚僵化，齋按本子辦事，固然有口皆悲，港府投放資源不足，前線人員疲於奔命，根本冇時間深入了解個案，嗰度先至最大鑊。
冇錯喇，公帑取之於民，用之於民，港府一味做守財奴，受害嘅點止兒童咁簡單。大家有眼見，長者長期病患護理服務僧多粥少，負責照顧嘅壓力爆煲，攬住一鑊熟嘅倫常慘案不絕如縷；又好似為女性提供免費子宮頸癌疫苗，即使所費無幾，官老爺一樣係無動於衷，問你點頂。
一個人講咩唔重要，做咩先至最重要。林鄭開口埋口以做過社署署長為榮，懶係深知民間疾苦咁款，一單虐兒悲劇，係龍係蛇即時無所遁形！